ԿԱՏԻԱ ՔՈՒՇԵՐԵԱՆ
Ուշադիր դիտելու դէպքում կարելի է նկատել, որ կեանքը նաեւ ընտրութիւններ կատարելու անընդմէջ շարան է: Ընտրութիւն ենք կատարում՝ սկսած առօրեայ գործերի թէ կարեւոր որոշումներ կայացնելու պարագայում: Ամենափոքր ու աննշան թուացող առտնին խնդիրներից մինչեւ ամուսնութեան, ուսումը այս կամ այն ուսումնական հաստատութեան մէջ ստանալու, քաղաքական կողմնորոշում որդեգրելու, բազմաթիւ ու տարատեսակ կազմակերպութեանց անդամակցելու անհրաժեշտութիւնը մեզ դնում է ընտրութիւն կատարելու անշրջանցելի պարտադրանքի առջեւ:
Մեր ժամանակներում, մանաւանդ, երբ օրէցօր ընդլայնւում են իմացութեան եւ տեղեկատուութեան սահմանները, ակներեւ է դառնում ընտրութիւն կատարելու անհրաժեշտութիւնն ամէն ինչում, խնայողաբար եւ առաւել արդիւնաւէտութեամբ գործածելու համար մեզ տրամադրուած մշտապէս անփոփոխ ժամանակը՝ օրն ու տարին: Փորձելով քսանչորս ժամուայ ընթացքում ամբողջացնել մեր առջեւ դրուած բոլոր առաջադրանքները, կարող ենք արձանագրել որակի անկում, նաեւ հոգեկան անբաւարարուածութեան, նոյնիսկ մեղաւորութեան զգացում եւ ֆիզիքական ուժերի սպառում:
Ուստի, առաջանում է ոչ միայն խոհեմ ընտրութիւն կատարելու, այլեւ առաջնայինը երկրորդականից տարբերելու կարողութեան դրսեւորում մեր անձնական, ընտանեկան եւ հասարակական գործերի մէջ:
Տասնեակ թերթեր եւ ամսագրեր, անհամար կայքէջեր ու հեռուստատեսութիւն, ամէն օր հրամցնում են քաղաքական, մշակութային, տնտեսական ու կրօնական բնոյթի հաղորդումներ, իսկ համացանցից օգտուելը, յիրաւի, նման է տիեզերական ովկիանոսի մէջ անծայրածիր նաւարկութեան, իսկ եթէ ընտրութիւն չենք կատարում, նման ենք նաւահանգիստ չհասնող անկողմնացոյց նաւի:
Ուստի, երբ օգտւում ենք տեղեկատուական միջոցներից, պէտք է բծախնդիր լինենք ե՛ւ քանակի, ե՛ւ որակի հարցում: Պէտք չէ մոռանալ, որ յատկապէս համացանցում, օգտակարի կողքին կան վնասակար նիւթեր, որոնք կարող են ապակողմնորոշել մեզ, նաեւ աղտոտել մեր հոգեկան եւ մտաւոր աշխարհը:
Թերթ չընթերցել, չօգտուել հեռուստատեսութիւնից կամ կայքէջից արդի յարափոփոխ ու սրընթաց ժամանակներում, կարող է մեզ կտրել աշխարհից, պարփակել նեղ ու անձուկ շրջանակում, ենթարկելով վտանգաւոր մեկուսացման, որպէս անձ եւ հասարակութեան անդամ:
Կարծում ենք, նոյնիսկ մանկավարժութեան ասպարէզում, մատաղ սերնդի դաստիարակութեան գործում, առանց բացատրութեան կարելի է եւ կարելի չէ սկզբունքի կիրառութեան, լաւ է վաղ հասակից սովորեցնել եւ մշակել ընտրութիւն կատարելու այնքան արժէքաւոր կարողութիւնը:
Այն կարեւոր է բոլոր դէպքերում եւ բոլոր տարիքների համար: