ԿԱՐՕ ՓԱՅԼԱՆԻ ԲԱՑԱՌԻԿ ՀԱՐՑԱԶՐՈՅՑԸ NEWS.AM-ԻՆ
Վարեց՝ ԳԱՅԻԱՆԷ ԱԼԵՔՍԱՆԵԱՆ
Սոցցանցերից միշտ ստացել եմ սպառնալիք կամ հայհոյանք, որի թիրախում է եղել իմ հայ ինքնութիւնը: Այդ մասին NEWS.am-ին տուած բացառիկ հարցազրոյցում ասել է Թուրքիայի քրդական Ժողովուրդների դեմոկրատական կուսակցութեան պատգամաւոր Կարօ Փայլանը:
Հարցազրոյցը ներկայացնում ենք ձեր ուշադրութեանը:
ԳԱՅԻԱՆԷ ԱԼԵՔՍԱՆԵԱՆ.- Թուրքիայի խորհրդարանում տեղի ունեցածից յետոյ դուք անհանգստանո՞ւմ էք ձեր անվտանգութեան ու կեանքի համար:
ԿԱՐՕ ՓԱՅԼԱՆ.- Ոչ միայն ինձ, այլ Թուրքիայում ընդդիմութեանը փորձում են լռեցնել եւ մարսել: Մենք էլ շարունակում ենք պայքարել: Ի հարկէ, հայ ընդդիմադիր լինելու դէպքում վտանգը աւելի մեծ է: Մեջլիսում տեղի ունեցած դէպքը ծրագրաւորուած էր ու ատելութեան հողի վրայ ինքնադատաստանի փորձ էր:
ԳԱՅԻԱՆԷ ԱԼԵՔՍԱՆԵԱՆ.- Խորհրդարանում տեղի ունեցած միջադէպից յետոյ ձեր նկատմամբ ճնշումներ եղե՞լ են Թուրքիայի ազգայնականների կամ իշխանութիւնների կողմից:
ԿԱՐՕ ՓԱՅԼԱՆ.- Սոցցանցերից միշտ ստացել եմ սպառնալիք կամ հայհոյանք, որի թիրախում է եղել իմ հայ ինքնութիւնը: Խորհրդարանում տեղի ունեցած դէպքից յետոյ աւելի շատ տեսանելի են դարձել ինձ աջակցողների ուղերձները:
Ժողովուրդների դեմոկրատական կուսակցութեան պատգամաւորների թիրախաւորումներն ու նրանց հասցէին վիրաւորանքները շարունակում են: Դա էլ ղեկավարւում է նախագահական պալատի կողմից:
ԳԱՅԻԱՆԷ ԱԼԵՔՍԱՆԵԱՆ.- Թուրքիայի վարչապետ Ահմեդ Դաւութօղլուն հեռանում է: Այդ փաստը ինչպէ՞ս կ՛անդրադառնայ Թուրքիայի ներքին ու արտաքին քաղաքականութեան վրայ:
ԿԱՐՕ ՓԱՅԼԱՆ.- Ահմեդ Դաւութօղլուի պաշտօնից հեռացումը նշանակում է նաեւ Թուրքիայում ռեժիմի փոփոխութեան քայլերից մէկը: Իշխանութիւնում գտնուող Արդարութիւն եւ զարգացում կու-սակցութեան անդամների ասածի պէս «ամէն ինչից յետոյ Թուրքիայում այլեւս հնարաւոր չէ խօսել վարչապետութեան պաշտօնի մասին»: Էրդողանը Դաւութօղլուից յետոյ փնտռում է այնպիսի մէկին, ով լսելու է իր խօսքը: Մենք դա անուանում ենք քաղաքացիական յեղաշրջում:
Մինչ Դաւութօղլուն ԵՄի հետ յարաբերութիւնները զարգացնելու քայլեր էր ձեռնարկում, Էրդողանը քաղաքացիական յեղաշրջում կատարեց եւ անմիջապէս յետոյ իր ելոյթում նշեց հետեւեալը. «Դուք՝ ձեր, մենք էլ՝ մեր ճանապարհով»: Փաստօրէն, Էրդողանը ոչնչացրեց ամենափոքր քայլերը: Թուրքիան ամէն օր աւելի է հեռանում ժողովրդավարութիւնից:
ԳԱՅԻԱՆԷ ԱԼԵՔՍԱՆԵԱՆ.- Պատգամաւոր եղած ժամանակ ինչ որ աշխատանքներ արե՞լ էք Ստամբուլի հայ համայնքը համախմբելու համար:
ԿԱՐՕ ՓԱՅԼԱՆ.- Երկար տարիներ ղեկավարել եմ համայնքի տարբեր հաստատութիւնները: Հայ համայնքի խնդիրները լաւ գիտեմ: Պատգամաւոր ընտրուելուց առաջ խնդիրների լուծման համար պայքարում էի, հիմա էլ նոյն պայքարը տալիս եմ խորհրդարանում: Թուրքիայի հայերը մի քանի տարի առաջ ապրում էին աւելի հանգիստ ժամանակաշրջանում, իսկ հիմա զգում են Հրանդ Դինքի ասած «աղաւնու յուզմունքը», այսինքն անհանգիստ են:
Հայերը կարող են գոյատեւել ժողովրդավար Թուրքիայում: Ես պայքարում եմ այս մտքի իրականացման համար:
ԳԱՅԻԱՆԷ ԱԼԵՔՍԱՆԵԱՆ.- Պատգամաւոր դառնալուց յետոյ կարողացե՞լ էք հայ համայնքի որոշ խնդիրները լուծել:
ԿԱՐՕ ՓԱՅԼԱՆ.- Թուրքիայի հայերը ունեն ներկայացման խնդիր: Հայերը ներկայ պահին չեն կարողանում ընտրել պատրիարքին եւ հիմնադրամների ղեկավարներին: Ընտրական համակարգը գտնւում է կողպէքի տակ, շարունակում ենք աշխատել այդ խնդիրները լուծելու համար: Բացի այդ, զբաղւում եմ հայկական դպրոցների հարցերի եւ չվերադարձուող անշարժ գոյքերի հետ: Կարճ ժամանակ առաջ հարց եմ ներկայացրել, Դիարբեքիրի Սուրի շրջանում պետականցուող տարածքների վերաբերեալ, որը ընդգրկում է Սուրբ Կիրակոս հայկական եկեղեցին եւ այլ ազգերին պատկանող սրբավայրերը: Շարունակում ենք հետեւել թեմայի վերաբերեալ զարգացումներին: Այս ամէնը չեն կարող լուծուել արագ, բայց բոլորի համար շարունակում ենք աշխատանքներ կատարել:
NEWS.am