«Մեր Կուսակցութեան Ուժը Միասնական Լինելն Է». Արմէնուհի
«Հայելի» կայքը հետեւեալ հարցազրոյցը կատարած է Ազգային ժողովին մէջ ՀՅԴ նախկին պատգամաւոր Արմէնուհի Կիւրեղեանին հետ:
«ՀԱՅԵԼԻ».- ՀՅԴ 33րդ Ընդհանուր ժողովն անցկացուեցաւ Արցախում, ինչն աննախադէպ էր, որեւէ տողատակ կա՞ր:
ԱՐՄԷՆՈՒՀԻ ԿԻՒՐԵՂԵԱՆ.- Միգուցէ նաեւ ցանկութիւն ունէինք արձագանգելու այն յայտարարութիւններին, որ արեւելեան եւ արեւմտեան թեւի միջեւ հակասութիւններ կան, կարծիքների բախում: Նաեւ մէկ այլ խորհուրդ կար՝ Արցախը մերն է, Արցախը Հայաստանն է, Հայաստանը՝ Արցախ:
«ՀԱՅԵԼԻ».- Չգիտեմ, դուք ձեզ ընդդիմութիւն հռչակեցի՞ք, թէ՞ չէ, բայց, եթէ իշխանութեան մէջ չէք, ուրեմն ընդդիմութիւն էք:
ԱՐՄԷՆՈՒՀԻ ԿԻՒՐԵՂԵԱՆ.- Անուններ չտանք, որովհետեւ այսօրուայ ընդդիմութիւնը, չգիտեմ, իրօք ընդդիմութի՞ւն է, թէ՞ ոչ, մենք մեր կարծիքն ենք յայտնել, յայտնում ենք եւ յայտնելու ենք կառավարութեան այն քայլերի վերաբերեալ, որոնք վնասելու են մեր երկրի պետականութեանը, հզօրացմանը: Մենք արտախորհրդարանական հզօր ուժ ենք, որը պայքարելու է ամբողջական իշխանութիւնը վերցնելու համար:
«ՀԱՅԵԼԻ».- Ինչո՞ւ էք վախենում ընդդիմութիւն բառից:
ԱՐՄԷՆՈՒՀԻ ԿԻՒՐԵՂԵԱՆ.- Ես ասում եմ՝ հանրութեան մէջ ընդդիմութեան ընկալումը մի տեսակ այլ է:
«ՀԱՅԵԼԻ».- Գուցէ հէնց այս դիրքորոշումն էր պատճառը, որ անցած ընտրութիւնների ժամանակ ձախողեցիք, որովհետեւ տարիներ շարունակ ձեզ քննադատել են այն բանի համար, որ ասել էք՝ մենք ե՛ւ ընդդիմութիւն ենք, ե՛ւ իշխանութիւն: Ամէն ինչ մեր երկրում փոխւում է՝ բացի Հայ Յեղափոխական Դաշնակցութիւնից:
ԱՐՄԷՆՈՒՀԻ ԿԻՒՐԵՂԵԱՆ.- Շնորհակալ եմ հարցի համար, որովհետեւ հանրութեան մէջ անընդհատ այդ տեսակէտը բաց է թողնւում՝ որպէս ուղերձ: ՀՅԴն մի ուժ է, որը պայքարել է, պայքարում է եւ պայքարելու է պետականութեան հզօրացման համար: Այո՛, գնացել ենք ՀՀԿի հետ, գիտակցել ենք, որ վարկանիշը իջնելու է, խնդիրը ոչ թէ եղել է վարկանիշը, այլ նպատակի իրականացումը՝ հասնել խորհրդարանական համակարգի հաստատմանը Հայաստանում:
«ՀԱՅԵԼԻ».- Միջոցներ ունէիք, որոնք ընտրութիւնների ժամանակ շատ լաւ կիրառում էիք:
ԱՐՄԷՆՈՒՀԻ ԿԻՒՐԵՂԵԱՆ.- Եթէ կարողանայինք կիրառել, այս խորհրդարանում կը լինէինք, այն ժամանակ էլ 5 տոկոս չէինք հաւաքի: Մենք գործել ենք արդար ճանապարհով եւ միգուցէ մենք խնդիր ունենք հանրութեան մէջ մեր վարկանիշի բարձրացման: Չենք հերքում, որ ՀՀԿի հետ քոալիսիոնը մեր վարկանիշը իջեցրել է: Այսօր մենք ասում ենք, որ ամէն ինչ անելու ենք մեր կառոյցը հզօրացնելու համար, արեւելեան եւ արեւմտեան թեւերի հետ համատեղ ծրագրերը իրականացնելու համար:
«ՀԱՅԵԼԻ».- Յեղափոխութեան ժամանակ Սփիւռքը շատ ոգեւորուած էր: Յայտնի է, որ ՀՅԴն ամենահզօրն է Սփիւռքում, ի՞նչ մօտեցում կայ այսօրուայ իշխանութեան նկատմամբ:
ԱՐՄԷՆՈՒՀԻ ԿԻՒՐԵՂԵԱՆ.- Ընդհանուր ժողովը ընդունել է որոշակի բանաձեւ, եւ ընդհանուր ժողովի ժամանակ է այդ բանաձեւն ընդունուել, ըստ որի, մենք գնում ենք ամբողջական իշխանութիւն վերցնելու: Բոլոր թեւերն էլ նոյն բանաձեւերն են որդեգրել:
«ՀԱՅԵԼԻ».- Հրանդ Մարգարեանը խիստ գնահատականներ հնչեցրեց, եւ տպաւորութիւն էր, որ շատ շուտ ՀՅԴն բոլորովին այլ դիրքերից է խօսելու, որովհետեւ Հրանդ Մարգարեանը պատահական մարդ չէ, եթէ նման բան է ասում, ուրեմն խմորումներ կան ՀՅԴի ներսում: Դրան յաջորդում են մի շարք փոփոխութիւններ, այդ թւում Հրանդ Մարգարեանի հեռանալը Բիւրոյի կազմից:
ԱՐՄԷՆՈՒՀԻ ԿԻՒՐԵՂԵԱՆ.- Եթէ Հրանդ Մարգարեանը Բիւրոյի կազմում չէ, դա նշանակո՞ւմ է ՀՅԴ փոխեց իր ուղեգիծը: Հրանդ Մարգարեանի հնչեցրած բոլոր խօսքերը միս ու արիւն դարձած՝ արտացոլուել են Ընդհանուր ժողովի բանաձեւում: Մեր կուսակցութեան ուժը խմբային, միասնական լինելն է եւ յստակ բանաձեւումը եթէ կայ, կապ չունի Բիւրոյի ներկայացուցիչը Հրանդ Մարգարեա՞նն է, թէ՞ մէկ ուրիշը:
«ՀԱՅԵԼԻ».- Նախկինում ամենամեծ ներդրողները Ռուսաստանի Դաշնութիւնից էին գալիս, հիմա արդէն չեն գալիս: ՀՅԴն իր կուսակից ընկերներին ազա՞տ է թողել, գալի՞ս են աշխոյժ ներդրումներ անում, թէ՞ ոչ:
ԱՐՄԷՆՈՒՀԻ ԿԻՒՐԵՂԵԱՆ.- Ներդրումների հոսքը մեծացնելու համար պէտք է յստակ ներդրումային քաղաքականութիւն տարուի, որը կը ստեղծի նպաստաւոր պայմաններ: Իսկ նպաստաւոր պայմանների համար պէտք է ներդրումների պաշտպանութեան մասին օրէնք, ապահովագրութեան մասին օրէնք, գերիշխան ներդրումային ֆոնտի գաղափարը, ընդ որում, այդ նշուած օրէնքների նախագծերը Արծուիկ Մինասեանի նախարար լինելու ժամանակ արդէն դրուել էին կառավարութեան քննարկմանը: Պէտք է միջավայր ստեղծուի, ներդրումներ հէնց այնպէս չեն գալիս, ինչպէս մեր վարչապետն է ասում. ներդրումները մինչեւ օրս հեռախօսազրոյցների մակարդակի վրայ են:
«ՀԱՅԵԼԻ».- Բայց նախկինում գալիս էին:
ԱՐՄԷՆՈՒՀԻ ԿԻՒՐԵՂԵԱՆ.- Որպէսզի ոեւէ մէկը որոշի իր ֆինանսները բերի Հայաստան՝ որեւէ տնտեսական ճիւղ զարգացնելու համար, նա պէտք է համապատասխան ներդրումային միջավայր տեսնի: Առայժմ այդ միջավայրը չկայ, դրանք դեռ հեռախօսի մակարդակի են: Ես վարչապետին հարցրեցի, թէ ո՞ւր են այդ հեռախօսային խոստումներով միլիոնաւոր տոլարների ներդրումները, նա պատասխանեց՝ գիտէ՞ք, տիկի՛ն Կիւրեղեան, ներդրումները բարձի տակ դրուած գումար չեն, որ վերցրեն եւ բերեն: Այսքան ժամանակ է անցել, որ եթէ դրանք բարձի տակ էլ չէ, այլ տոշակի կամ մաթրասի տակ լինէին, հիմա վաղուց արդէն դրանց հանելու ժամանակը եկել էր: Միջավայր՝ նշանակում է օրէնսդրական համապատասխան փոփոխութիւններ: Յայտարարել, որ ոչ մէկը փայ չի մտնելու, չի խանգարելու, դա քիչ է, պէտք է կայուն եւ օրէնսդրական միջավայր:
«ՀԱՅԵԼԻ».- Կանգնեցիք, չէ՞, իրենց կողքին, ողջունեցիք այս փոփոխութիւնը:
ԱՐՄԷՆՈՒՀԻ ԿԻՒՐԵՂԵԱՆ.- Փոփոխութիւնների անհրաժեշտութիւն միշտ էլ կայ: Ցանկացած ամենաբարձր զարգացած երկրում փոփոխութիւնների անհրաժեշտութիւն կայ: Ողջունեցինք այն փաստը, որ ժողովուրդը վերջապէս հասկացաւ, որ ինքն է տէրը այս երկրի, որ՝ վերջապէս ժողովուրդը հասկացաւ, թէ ինքը պէտք է լինի պահանջատէր:
«ՀԱՅԵԼԻ».- «Դուին» հիւրանոցային համալիրի սեփականատէրը, ով յայտնի գործարար է եւ մեծ ներդրումներ է արել Հայաստանում, վերջերս հարցազրոյց էր տուել եւ խօսել բազմաթիւ խնդիրներից, այն մասին, թէ ինչո՛ւ չեն կարող ներդրում անել: Խօսել էր նաեւ այն մասին, թէ այժմեան իշխանութեան հետ կապուած ի՛նչ խնդիրներ կան, եւ ի՛նչ էր տեղի ունենում նախկին իշխանութեան ժամանակ: Ասում էր՝ այս ամէնով հանդերձ, հայրենասիրական մղումներով որոշել եմ 50 միլիոն ներդրումներ անել: ՀՅԴի մէջ կա՞ն մարդիկ, որոնք այս խնդիրներով հանդերձ, հայրենասիրական մղումներով կը գնան այդ քայլին:
ԱՐՄԷՆՈՒՀԻ ԿԻՒՐԵՂԵԱՆ.- Ինչպէս վարչապետն է ասում՝ քննարկումների շրջան կայ, քննարկումներ են գնում: Վարչապետն ինքն է ասում, որ քննարկում է միլիոնաւոր տոլարների շուրջ, մենք էլ ունենք քննարկումներ, բայց միեւնոյն է, ցանկացած մէկի համար պիզնեսը առաջին հերթին ենթադրում է միջավայր:
«ՀԱՅԵԼԻ».- Այսպիսի մի յայտարարութիւն արեց վարչապետը՝ կարեւորը փողը չի, կարեւրը գաղափարն է:
ԱՐՄԷՆՈՒՀԻ ԿԻՒՐԵՂԵԱՆ.- Նա ասում էր կարեւորը փողը չի, եթէ կայ նպատակը, գաղափարը եւ նպատակին հասնելու յստակ ծրագիրը: Ուզում եմ այդ նոյն մտածողութիւնը զուգահեռ տեղաւորել մեր կառավարութեան ծրագրի մէջ, արդեօք կառավարութեան ծրագրում չկա՞յ այնպիսի գաղափար, նպատակների հասնելու յստակ նկարագրութիւններ, որ ներդրումներ չեն հոսում Հայաստան: Եթէ չկայ, ուրեմն մենք խնդիր ունենք կառավարութեան ծրագրի հետ: Եթէ կառավարութեան ծրագրում գաղափարները կան, քայլերը յստակ նկարագրուած են, ո՞ւր են ներդրումները:
«ՀԱՅԵԼԻ».- Աղքատութեան յաղթահարման հետ կապուած յայտարարեցին, որ 18.000ը պէտք է դառնայ 25.000:
ԱՐՄԷՆՈՒՀԻ ԿԻՒՐԵՂԵԱՆ.- Ես այդ մօտեցումը չեմ հասկանում, թիւ սահմանել եւ ասել, որ եթէ ամենացածր թոշակը կամ նպաստը լինի 25.000ից բարձր, ապա ծայրայեղ աղքատութիւնը կը յաղթահարուի: Թիւը չի կարող սահմանափակել ծայրայեղ աղքատութեան երեւոյթը, որովհետեւ 25.500ից անմիջապէս յետոյ կարող է լինել գնաճ, այդ դէպքում այդ գումարը ստանում է նոյն արժէքը, ինչ-որ ժամանակին 18.000 էր: Ծայրայեղ աղքատութիւնը յաղթահարելու համար յստակ մօտեցում է պէտք, պարէնային նուազագոյն զամբիւղի գաղափարը պէտք է օգտագործել, եւ դա համեմատութեան մէջ դնել ծայրայեղ աղքատութեան յաղթահարելու համար սահմանուած թոշակի հետ: Ամէն տարի նախկին կառավարութիւնն էլ նման բան էր անում: Մարդը դեռ իր թոշակը չէր ստացել, գնաճ էր գնում, եւ այդ թոշակի բարձրացումը ոչ մի կերպ չէր ազդում այդ մարդու ապրելակերպի վրայ:
«ՀԱՅԵԼԻ».- ԱՎԾն հրապարակել է Փետրուար ամսուայ տուեալները. ըստ դրանց, շինարարութեան, աշխատավարձերի աճ արձանագրւում է, այսինքն վիճակագրօրէն կեանքի որակը դէպի լաւ է գնում: Ելեկտրականութեան ծախսի եւ արտադրութեան հետ կապուած նուազում է նկատւում:
ԱՐՄԷՆՈՒՀԻ ԿԻՒՐԵՂԵԱՆ.- Միգուցէ կեանքի որակի լաւացման՝ իմ եւ ԱՎԾի վերլուծողների պատկերացումները տարբեր են: Ի՞նչ է նշանակում կեանքի որակի բարձրացում, ես ընկալում եմ, որ դա ենթադրում է ելեկտրականութեան աւելի շատ օգտագործում, եթէ աւելի շատ եմ սարքերից օգտւում իմ արժանապատիւ կեանքի համար, միգուցէ այդ չափորոշիչը չենք նշում, բայց եթէ ելեկտրականութեան սպառումը նուազել է 21 տոկոսով, ես ինչո՞վ կարող եմ ենթադրել, որ կեանքի որակ է բարձրացել: Եթէ շինարարութեան ծաւալներն աւելացել են, անմիջապէս ենթադրութիւններ անել կեանքի որակի բարձրացման՝ ճիշդ չէ:
«ՀԱՅԵԼԻ».- Վերջերս յայտարարութիւն արեցիք, ասացիք՝ ես ինձ Հայաստանի քաղաքացի եմ համարում, բայց կառավարութեան նշած այդ Քաղաքացու օրուայ խորհուրդը չեմ հասկանում: Լեւոն Տէր Պետրոսեանը հրաժարական տուեց, բա ինչի՞ այդ օրն էլ չենք նշում Քաղաքացու օր:
ԱՐՄԷՆՈՒՀԻ ԿԻՒՐԵՂԵԱՆ.- Լրագրողը, երբ ինձ հարցրեց, ես ասացի, որ Քաղաքացու օրուայ խորհուրդը չեմ հասկանում: Լրագրողը ասաց, որ բացատրում են՝ ապրիլի 23ին Սերժ Սարգսեանը հրաժարական տուեց, դրան ի պատասխան նշեցի, որ եթէ այդպէս է, ապա ժամանակին Լեւոն Տէր Պետրոսեանն էլ է հրաժարական տուել, դա աւելի մեծ ձեռքբերում է Հայաստանի քաղաքացու համար:
«ՀԱՅԵԼԻ».- Ո՛չ Ռոպերթ Քոչարեանը, ո՛չ էլ Սերժ Սարգսեանը Լեւոն Տէր Պետրոսեանի հրաժարականից յետոյ նրան չբնութագրեցին այնպէս, ինչպէս որ Լեւոն Տէր Պետրոսեանը 2008ին եկաւ եւ բնութագրեց վարչակարգը եւ պէտք է օր առաջ ազատուել նրանցից:
ԱՐՄԷՆՈՒՀԻ ԿԻՒՐԵՂԵԱՆ.- Մենք պէտք չէ մոռանանք, որ Լեւոն Տէր Պետրոսեանի հրաժարականը պատճառներ ունէր, նրանից պահանջեցին, պահանջը ներքեւից էր, քանի որ տնտեսութիւնն էր քանդուել, նրա իշխանութեան օրօք ապրում էինք սեւ ու մութ պայմաններում, եւ այդ ամէնը կապել միայն արցախեան պատերազմին՝ սխալ կը լինի: Այդ օրերին ունէինք արտադրութեան անկում, արտադրամասերը, գործարանները սեփականաշնորհուեցին էժան գներով, թալանուեցին: Այսօր էլ դեռ հետքերը կան, երբ ես Երեւանից Վանաձոր եմ հասնում, ճանապարհին այդ թալանուած գործարաններն են, միայն պատերն ու կմախքները մնացած: Մենք արտադրութիւն չունէինք, տնտեսութեան ոչ միայն զարգացում չունէինք, այլ անկում ունէինք:
«ՀԱՅԵԼԻ».- Նախկին իշխանութիւնները արժանի գնահատական չտուեցին:
ԱՐՄԷՆՈՒՀԻ ԿԻՒՐԵՂԵԱՆ.- Եթէ ամէն նոր իշխանութիւն գայ եւ փոխանակ փնտռի զարգացման ճանապարհը եւ երկրի հզօրացումը, այլ նայելով հնին՝ սկսի միայն քննադատելը, լաւ բանի չենք հասնի: Ի հարկէ քննադատելն էլ է պէտք, բայց սա պէտք է լինի գործունէութեան շատ փոքր տոկոսը: Ամբողջ կառավարութեան գործունէութիւնը յենել միայն նախկինների քննադատութեան վրայ, անհեթեթութիւն է: Բա ո՞ւր մնաց երկրի զարգացումը: Իշխանութեան էին եկել այն ակնկալիքով, որ երկիրը սկսելու է զարգացման ճանապարհ բռնել: Իմ ասածը ոչ թէ Դաշնակցութեան հետ Լեւոն Տէր Պետրոսեանի վերաբերմունքի պատասխանն էր, այլ իրականութիւնը՝ Քաղաքացու օրը: Հասկանում եմ, որ մեր սահմանադրութեամբ քաղաքացին գերագոյն արժէք է, ապա, եկէք, Քաղաքացու օրը նշենք սահմանադրութեան օր: Եթէ խօսում ենք մարդ-քաղաքացի յարաբերութեան մասին, կայ Դեկտեմբերի 10՝ Մարդու իրաւունքների պաշտպանութեան օր:
«ՀԱՅԵԼԻ».- Ամէն ինչ սկսում ենք նոր էջից:
ԱՐՄԷՆՈՒՀԻ ԿԻՒՐԵՂԵԱՆ.- Ես կողմնակից կը լինէի, որ այս շարժումից յետոյ մեր երկրում տնտեսութեան զարգացման ծիլերը նկատուէին, խօսում ենք քաղաքացու մասին, կեանքի որակի բարձրացման, արժանապատիւ կեանքի համար պայմանների ստեղծում: Իսկ արժանապատիւ կեանքի պայմանների բարելաւումը սկսել աշխատատեղերի կրճատումով՝ սխալ եմ համարում:
«ՀԱՅԵԼԻ».- Լեւոն Տէր Պետրոսեանի հետ ամենամեծ հակասութեան մէջ եղել է ՀՅԴն, բայց եկաւ մի պահ, որ դուք «Հրաշալի քառեակ» կազմեցիք, շատ աշխոյժ փորձ էր արւում իշխանութիւն վերցնելու, այդ ժամանակ նստեցիք սեղանի շուրջ Լեւոն Տէր Պետրոսեանի հետ, յանուն ինչի՞ էիք առաջ նայում:
ԱՐՄԷՆՈՒՀԻ ԿԻՒՐԵՂԵԱՆ.- Ընտրական օրէնսգրքի փոփոխութիւնների շուրջ էին բանակցութիւնները: Ոչ ոք չի ուզում տեսնել, որ ՀՅԴի համար առաջնայինը պետութեան զարգացումը, պետականութեան ամրագրումն էր, որն էլ ենթադրում էր այդ օրերին ընտրական օրէնսգրքի որոշակի փոփոխութիւններ: Եթէ բանակցութիւնները չլինէին, ընտրական օրէնսգիրքը չէր փոխուի: Դրանք բերեցին հետագայ փոփոխութիւնների:
«ՀԱՅԵԼԻ».- Լեւոն Տէր Պետրոսեանի, իր խմբակի նպատակները այդ փուլում ազնիւ՞ էին:
ԱՐՄԷՆՈՒՀԻ ԿԻՒՐԵՂԵԱՆ.- Եթէ պէտք լինի, կը բանակցենք նաեւ սատանայի հետ, եթէ դա է պահանջում մեր պետութեան, մեր պետականութեան շահը:
«ՀԱՅԵԼԻ».- Հիմա բոլորը ասում են, որ եթէ դուք 2008ն էք ասում, եկէք՝ յիշենք 1996 թուականը, եթէ դուք ասում էք Սերժ Սարգսեան, եկէք՝ յիշենք Լեւոն Տէր Պետրոսեանին:
ԱՐՄԷՆՈՒՀԻ ԿԻՒՐԵՂԵԱՆ.- Այդ կառավարութեան օրօք էր, որ ընտրութիւնները զանգուածաբար կեղծուել են, ընտրախախտումները այնքա՛ն բարձր մակարդակի են հասել, որ մինչեւ օրս չի գերազանցուել: Եթէ այդպէս է, եկէք՝ այդ խախտումներից սկսենք, չաշխատենք երկակի չափանիշներով: Արդարութիւնը միակողմանի եւ կիսատ չի լինում:
«ՀԱՅԵԼԻ».- Շատերն ասում են՝ թէ, եթէ սկսել են, ուրեմն Մարտի 1ից յետոյ կ՛անցնեն Հոկտեմբերի 27ին, շատերն էլ ասում են, որ այս ամէնն արւում է, որպէսզի քողարկուի տնտեսական վատ վիճակը: Եթէ ասում էք՝ այո՛, ուրեմն այսօրուայ իշխանութիւններին հնարաւորութիւն էք տալիս, որպէսզի մի 5 տարի զբաղուեն այդ գործերով:
ԱՐՄԷՆՈՒՀԻ ԿԻՒՐԵՂԵԱՆ.- Թող իրաւապահները զբաղուեն իրենց դատավարութիւնները իրականացնելով: Եթէ մենք ասում ենք՝ գնացէք ու զբաղուէք դրանով, մենք չենք ասում միայն դրանով զբաղուէք:
«ՀԱՅԵԼԻ».- Դրանով զբաղեցնում են հանրութեա՞նը:
ԱՐՄԷՆՈՒՀԻ ԿԻՒՐԵՂԵԱՆ.- Օրակարգում պէտք չէ դնել միայն այդ հարցերը, զուգահեռ եւ աւելի խորը պէտք է լինեն տնտեսութեան զարգացման խնդիրները: Կառավարութիւնը պէտք է զբաղուի տնտեսական, արտաքին քաղաքականութեամբ, օրինապահները՝ իրենց: Մարդկանց զբաղեցնում են կեղծ օրակարգերով, կամ՝ կիսատ:
«ՀԱՅԵԼԻ».- Մեղրիում զինուորականները լքեցին զօրամասերը, լուրջ քննադատութեան առարկայ դարձաւ, ինչի՞ հետեւանք էր սա: Մեղրիի թեման այս օրերին շահարկւում է նաեւ այն առումով, որ առաջ են եկել մարդիկ, որոնք յղում են կատարում Վազգէն Սարգսեանին, Կարէն Դէմիրճեանին եւ ասում, որ Մեղրիի վերադարձի հարցը օրակարգում է եղել, եւ դա կապում են Քոչարեանի գործի հետ:
ԱՐՄԷՆՈՒՀԻ ԿԻՒՐԵՂԵԱՆ.- Ես յստակ տուեալներ չունեմ եւ չեմ կարող հիմք ընդունել Շիրխանեանի նամակը, ո՞ւր են այդ հիմնաւորումները: Ես մաթեմաթիքոս եմ, եւ միշտ սիրել եմ ապացուցելու համար հիմնաւորումներ ունենալ: Այն փաստը, որ Մեղրին չի յանձնուել, ո՛չ Քոչարեանի, ո՛չ Լեւոն Տէր Պետրոսեանի, ո՛չ Սերժ Սարգսեանի օրօք, դա փաստ է: Իսկ այն պնդումները, որ Ռոպերթ Քոչարեանը ուզում էր յանձնել, հիմնաւոր չեն, պէտք է փաստերը լինեն: Փաստերի հիման վրայ պէտք է եզրայանգումներ անել, փաստերը թող դնեն հանրութեան առաջ, հանրութիւնը, իրաւապահ մարմինները սկսեն քննարկել հարցը:
«ՀԱՅԵԼԻ».- Ինչո՞ւ այս փուլում օրակարգ բերուեց հարցը:
ԱՐՄԷՆՈՒՀԻ ԿԻՒՐԵՂԵԱՆ.- Ռոպերթ Քոչարեանի վրայ սարքած գործը ոչ մի կերպ չեն կարողանում հիմնաւորել, եւ ժամկէտները երկարաձգելու համար է:
«ՀԱՅԵԼԻ».- Ամէնուր պոյքոթ է, դասադուլ, գործադուլ, մի կողմից ասում ենք ժողովրդավարութեան դրսեւորում է, մարդիկ իրենց իրաւունքների համար պայքարում են: Բայց սա պետութիւն է, եւ ի՞նչ հետեւանքներ կ՛ունենայ այս ամէնը:
ԱՐՄԷՆՈՒՀԻ ԿԻՒՐԵՂԵԱՆ.- Աւշար համայնքի բնակիչները բողոքում էին եւ չէին ընդունում մարզպետարանի կողմից նշանակուած թեկնածուին, հիմնաւորում էին, որ տնօրէնը նոյն օրը պարտադրել է ուսմասվարին հրաժարական տալ եւ նրա փոխարէն՝ նշանակել մէկին, ով մարզպետի մօրաքրոջ հարսն էր: Երբ կարդում ենք նոյն տնօրէնի գրառումը, ով հրաժարւում է դպրոցի պաշտօնից եւ դիմում է հանրութեանը, որ չի կարելի դա թուլութիւն չհամարել, քանի որ ինքը յղի է եւ չի ուզում, որ այս ամէնն ազդի իր երեխայի վրայ: Ես ընդունում եմ, որ ինքը որպէս կին՝ ճիշդ է վարուել, բայց հո նոր չիմացաւ, որ յղի է, պէտք չէր հասնել այդ ամէնին: Կարող եմ մի բան ենթադրել. ստացւում է, որ յղի կնոջը նշանակեցին տնօրէն, փոխտնօրէն էին նշանակում մարզպետի բարեկամին, որ մի քանի ամիս յետոյ մարզպետի բարեկամը դառնայ տնօրէն: Ամէն ինչ պէտք է անեն, որ բանակում նման դրսեւորումները հնարաւորինս չլինեն:
«ՀԱՅԵԼԻ».- Ի՞նչ մօտեցումներով պէտք է առաջնորդուենք:
ԱՐՄԷՆՈՒՀԻ ԿԻՒՐԵՂԵԱՆ.- ՀՅԴն ասում է, որ մենք ամէն ինչին պէտք է համալիր նայենք, որովհետեւ մենք մի տեղ կարեւորում ենք ժողովրդավարացման մեքանիզմների իրագործման հնարաւորութիւնները Հայաստանում, մի տեղ մոռանում ենք ազգայինը, պետականը, արժէքային համակարգը: Դրանք համալիր մօտեցումներ են, որոնք պէտք չէ խախտուեն: Ժողովրդավարութեան անուան տակ սկսել էինք արժեզրկել արժէքային համակարգը:
«ՀԱՅԵԼԻ».- 1 տարի է անցել, փոփոխութիւններ տեսնո՞ւմ էք այս առումով: Պետական համալսարանի շուրջ աղմուկ բարձրացաւ, վարչապետը յայտարարեց՝ ով դուռ է փակել ուսանողների վրայ, անելիք չունի: Յստակ հասկացուեց, որ Արամ Սիմոնեանը պէտք է հրաժարական տայ:
ԱՐՄԷՆՈՒՀԻ ԿԻՒՐԵՂԵԱՆ.- Վարչապետը անուն չնշեց, ասաց՝ այն ռեկտորները, ովքեր դուռ են փակել ուսանողների առաջ, նրանք Հայաստանում անելիք չունեն, դրանից յետոյ կրթութեան նախարարն ասաց՝ կարծում եմ՝ դա ԵՊՀ ռեկտորի մասին է: Միգուցէ այդպէս են կարծում, միգուցէ իրօք վարչապետը նրան նկատի ունէր, չեմ կարող ասել, բայց դա ամենալաւ ձեւով վարչական միջոցի կիրառման օրինակ է, փտածութեան դրսեւորման օրինակ: Այսօր յայտարարել, որ մեր երկրում փտածութիւնը արմատախիլ է արուել, անհեթեթութիւն է, փտածութեան դէպք է Աւշարի դպրոցի տնօրէնի նշանակման հարցը: Հովանաւորչութեամբ պաշտօնների նշանակումը, վարչապետը կամ նախարարի շուրթերով հնչեցրած ուղերձները, արդէն փտածութեան դրսեւորումներ են:
«ՀԱՅԵԼԻ».- Իրենք մի լաւ բառ ունեն՝ իներցիա, իսկ այդ իներցիան միայն ՀՀԿից չեն վերցրել, նաեւ ՀՅԴից են վերցրել:
ԱՐՄԷՆՈՒՀԻ ԿԻՒՐԵՂԵԱՆ.- Իրե՞նք էլ են այդ իներցիայի տակ:
«ՀԱՅԵԼԻ».- Իրենք ընդունեցին, որ բաներ կան, իներցիայով է առաջ գնում:
ԱՐՄԷՆՈՒՀԻ ԿԻՒՐԵՂԵԱՆ.- Եթէ իրենք յայտարարում են, որ մեր երկրում փտածութիւնը արմատախիլ է արուած, մենք այլեւս չենք միջամտում, իրենք ելոյթ են ունենում եւ յայտարարում, որ այն ռեկտորը, ով դուռ է փակել ուսանողների վրայ, անելիք չունի: Ռեկտորին կարող է ազատել կամ նշանակել բուհի կառավարման խորհուրդը: Եթէ կառավարման խորհուրդը որոշի, այդ մարդը դուրս կը գայ պաշտօնից: Իներցիան իրենց վրայ էլ է: Բա ասում են՝ մենք քաղաքական կամք ունենք: Եթէ այդ առաջին դէմքերն էլ զերծ չեն իներցիայից, ապա մենք լուրջ խնդիրներ ենք ունենալու:
«ՀԱՅԵԼԻ».- Վատ աւանդոյթներ էք թողել:
ԱՐՄԷՆՈՒՀԻ ԿԻՒՐԵՂԵԱՆ.- Ես ընդունում եմ, որ ամենավերջին մակարդակներում, ամենավերջին օղակներում այդ իներցիան կայ, բայց վերեւի օղակներում դա արդէն վտանգաւոր է: