«ԵՐԿԻՐ»Ի ՀԱՐՑԱԶՐՈՅՑԸ ԳԵՂԱՐՔՈՒՆԻՔԻ ԴԱՇՆԱԿՑԱԿԱՆ ՆՈՐԱՆՇԱՆԱԿ ՄԱՐԶՊԵՏ ԻՇԽԱՆ ՍԱՂԱԹԵԼԵԱՆԻ ՀԵՏ

«Գեղարքունիքը Զարգացնելու Հսկայական Պոտենցիալ Կայ»

Զրուցեց՝ ԹԱԳՈՒՀԻ ՄԵԼՔՈՆԵԱՆ

Հայաստանի ամենամեծ մարզը՝ Գեղարքունիքը, առաջին անգամ կը ղեկավարի դաշնակցական մարզպետ: Խօսքը ՀՅԴ ԳՄ անդամ, 36ամեայ Իշխան Սաղաթելեանի մասին է, ով ծնունդով Գեղարքունիքի մարզի Գեղամաւան գիւղից է:

Նոր կառավարութեան կազմում ընգրկուելու, Գեղարքունիքի մարզում առկայ խնդիրների, մարզի զարգացման հեռանկարների եւ այլ հարցերի շուրջ «Երկիր»ը զրուցել է Իշխան Սաղաթելեանի հետ:

ԹԱԳՈՒՀԻ ՄԵԼՔՈՆԵԱՆ.- Ինչպէ՞ս էք պատկերացնում ձեր աշխատանքը նոր կառավարութիւնում:

ԻՇԽԱՆ ՍԱՂԱԹԵԼԵԱՆ.- Շատ վճռական եմ տրամադրուած, ծանօթ եմ կառավարութեան ներկայացրած ծրագրին, ծանօթ եմ մարզի խնդիրներին: Մարզը զարգացնելու եւ առկայ խնդիրները լուծելու վճռականութեամբ էլ ստանձնում եմ այս պատասխանատու պաշտօնը:

ԹԱԳՈՒՀԻ ՄԵԼՔՈՆԵԱՆ.- Օրէնսդիր եւ գործադիր մարմիններում ձեր ունեցած փորձը բաւարա՞ր է մարզի կառավարման ղեկը վերցնելու համար, չէ՞ որ ձեր ուսերին այսուհետ աւելի մեծ պատասխանատուութեան բեռ է ընկնելու:

ԻՇԽԱՆ ՍԱՂԱԹԵԼԵԱՆ.- Օրէնսդիր մարմնում աշխատել եմ 4 տարի, 2008-2009թթ. եղել եմ ԱԺ նախագահի տեղակալի խորհրդական, իսկ 2009-2012թթ.՝ ԱԺ պատգամաւորի օգնական: Բնապահպանութեան նախարարութիւնում աշխատել եմ նախարարի խորհրդական: Աշխատանքային գործունէութեանս մեծ մասը եղել է հասարակական հիմունքներով: Իհարկէ, մարզպետի աշխատանքը տարբեր է՝ աւելի պատասխանատու է եւ պարտաւորեցնող: Կառավարման ոլորտում ունեցած պատկերացումներս բաւարար են, որ գիտակցեմ առկայ խնդիրների լրջութիւնն ու մարզի զարգացման հեռանկարները:

ԹԱԳՈՒՀԻ ՄԵԼՔՈՆԵԱՆ.- Զարգացման ի՞նչ հեռանկարների մասին է խօսքը:

ԻՇԽԱՆ ՍԱՂԱԹԵԼԵԱՆ.- Գեղարքունիքի մարզի համար առաջնային է գիւղատնտեսութեան եւ զբօսաշրջութեան ոլորտների զարգացումը: Մարզի բնակելի հողերի 64 տոկոսից աւելին գիւղատնտեսական նշանակութեան հողեր են: Ժամանակին Գեղարքունիքի մարզը եղել է Հայաստանում հացահատիկի եւ կարտոֆիլի մշակման կարեւոր շրջաններից մէկը: Այս ոլորտում մեր մարզը հսկայական պոտենցիալ (հնարա-ւորութիւն-Խմբ.) ունի, որը լիարժէքօրէն չի օգտագործւում: Անշուշտ, գիւղատնտեսութեան ոլորտում որոշակի առաջընթացներ կան, սակայն դրանք բաւարար չեն: Բաւարար չեն, քանի դեռ մեր գիւղերից մարդիկ արտագաղթում են, չեն կարողանում լրացուցիչ բարիքներ ստեղծել եւ բարելաւել իրենց սոցիալական (ընկերային-Խմբ.) պայմանները:

ԹԱԳՈՒՀԻ ՄԵԼՔՈՆԵԱՆ.- Զբօսաշրջութեան զարգացման ի՞նչ հեռանկարներ կան Գեղարքունիքում: Սեւան քաղաքն, օրինակ, այդքան մօտ գտնուելով Սեւանայ լճին, զբօսաշրջային քաղաքի տպաւորութիւն ամենեւին չի թողնում:

ԻՇԽԱՆ ՍԱՂԱԹԵԼԵԱՆ.- Սեւանը, որպէս զբօսաշրջային քաղաք, զարգացման մեծ հնարաւորութիւններ ունի, սակայն ներկայիս ենթակառուցուածքներով բաւականին յետ է Հայաստանի միւս քաղաքներից, հետեւաբար՝ ներդրումների առումով այնքան էլ գրաւիչ չէ: Ինչ որ չափով դա պայմանաւորուած է նաեւ բնակլիմայական պայմաններով. Սեւանայ լճի սեզոնայնութիւնն (եղանակային շրջանը-Խմբ.) առաւելագոյնը երկու ամիս է, հետեւաբար՝ ներդրողների հետաքրքրութիւնները վերաբերում են միայն ամառային տուրիզմին: Պէտք է կոնկրետ քայլեր կատարել նաեւ Սեւանը ձմեռային տուրիզմի համար գրաւիչ շրջան դարձնելու համար:

ԹԱԳՈՒՀԻ ՄԵԼՔՈՆԵԱՆ.- Արդեօք ճի՞շդ է տուրիզմի զարգացման ողջ բեռը Սեւանայ լճի եւ մերձափնեայ գօտիների վրայ թողնելը:

ԻՇԽԱՆ ՍԱՂԱԹԵԼԵԱՆ.- Երբ ես ասում եմ՝ Սեւան, նկատի չունեմ միայն Սեւան քաղաքն իր մերձափնեայ շրջաններով: Սեւանայ լիճն ընդգրկում է 5 շրջան, որոնցից իւրաքանչիւրը տարբերւում է իր բնակլիմայական պայմաններով: Ճամբարակի, Վարդենիսի շրջանում կարող ենք զարգացնել էկօտուրիզմը կամ գիւղատնտեսական տուրիզմը, Մարտունու, Գաւառի հատուածում կարելի է արկածային տուրիզմը զարգացնել եւ այլն:

ԹԱԳՈՒՀԻ ՄԵԼՔՈՆԵԱՆ.- Վարչապետ Նիկոլ Փաշինեանն իշխանափոխութիւնից յետոյ բազմիցս կոչ է արել օտարերկրեայ ներդրողներին՝ Հայաստանում ներդրումներ իրականացնել: Ինչպէ՞ս էք պատրաստւում շահագրգռել ներդրողներին, որպէսզի ընտրեն հենց Գեղարքունիքը:

ԻՇԽԱՆ ՍԱՂԱԹԵԼԵԱՆ.- Անշուշտ, ստեղծուած իրավիճակում մենք նոր ոգով, նոր շնչով սկիզբ ենք դնելու նոր ծրագրերի իրագործմանը: Մենք պարտաւոր ենք, իբրեւ պետութիւն, ներդրողների համար ստեղծել լիարժէք, արդար եւ հաւասար պայմաններ, ապահովել, սակայն, որպէսզի մարզը ներդրողների համար գրաւիչ լինի, պետութիւնը պէտք է գործուն եւ հետեւողական քայլեր իրականացնի՝ ենթակառուցուածքներ ստեղծելով, ճանապարհները կարգի բերելով եւ այլն:

ԹԱԳՈՒՀԻ ՄԵԼՔՈՆԵԱՆ.- Գեղարքունիքի մարզում առաջին անգամ է նման բարձր պաշտօն վստահուել դաշնակցականի: Որքանո՞վ է պարտաւորեցնող այս պաշտօնի ստանձնումը ձեզ համար՝ թէ՛ որպէս կուսակցականի եւ թէ որպէս մարզի բնակչի:

ԻՇԽԱՆ ՍԱՂԱԹԵԼԵԱՆ.- Պարտաւորութիւնը բաւականին մեծ է, քանի որ կառավարութեանն իմ թեկնածութիւնն առաջարկել է Դաշնակցութիւնը: Ես ամէն ինչ անելու եմ, որպէսզի արդարացնեմ նոր կառավարութեան ու այն մարդկանց յոյսերը, ովքեր վստահել են ինձ եւ իմ կուսակցութեանը: Օգտագործելու եմ մեր կուսակցութեան համահայկական հնարաւորութիւնն ու ներուժը՝ մարզում տարբեր ներդրումային ծրագրեր, այդ թւում սոցիալական, իրականացնելու համար: Խօսքը Սփիւռքի դաշնակցական կառոյցների աջակցութեան մասին է: Արդէն իսկ որոշակի պայմանաւորուածութիւն կայ, որ այն մարզերը, որոնց ղեկավարումը վստահուած է դաշնակցական գործիչներին, Սփիւռքի մեր կառոյցների կողմից յատուկ ուշադրութեան պէտք է արժանանան:

ԹԱԳՈՒՀԻ ՄԵԼՔՈՆԵԱՆ.- Կարծիքներ կան, որ ՀՅԴի կողմից ՀՀԿի հետ կոալիցիոն յուշագիր ստորագրելը եւ քաղաքական իրողութիւնների փոփոխութեամբ այն դադարեցնելը հանրութեան տարբեր շերտերի մօտ որոշակիօրէն նուազեցրել են ՀՅԴի նկատմամբ վստահութիւնը: Կիսո՞ւմ էք այդ մտահոգութիւնը:

ԻՇԽԱՆ ՍԱՂԱԹԵԼԵԱՆ.- Դաշնակցութիւնն իր գործունէութեան 128 տարուայ ընթացքում շատ բարդ ուղի է անցել: Մենք երբեք չենք շեղւում մեր որդեգրած ռազմավարութիւնից, տարբեր իրավիճակներում երբեք չենք անի յայտարարութիւններ՝ ինչ որ շրջանակների հաճոյանալու համար: Մենք ունենք որդեգրած յստակ ռազմավարութիւն, որը բխում է մեր ժողովրդի շահերից: Իսկ ինչ վերաբերում է պահի տակ ՀՅԴի հեղինակութեան նուազմանը կամ աւելացմանը, ապա մենք մեր երկրում մշտապէս ունեցել ենք կայուն հետեւորդներ: Յուսով եմ՝ մեր առաջիկայ գործողութիւններով եւ քայլերով պայմանաւորուած, նրանց թիւը շեշտակի կ՛աւելանայ:

ԹԱԳՈՒՀԻ ՄԵԼՔՈՆԵԱՆ.- Տարածքային կառավարման եւ զարգացման նախարար Սուրէն Պապիկեանը երէկ լրագրողների հետ զրոյցում յայտարարել է, որ նոր նշանակուած մարզպետերը չեն կարող զբաղուել գործարարութեամբ, նման արգելք սահմանուած է նաեւ ՀՀ օրէնսդրութեամբ: Ձեր անուան հետ կապուած տարբեր բիզնեսներ կան, ի՞նչ կ՛ասէք այդ մասին:

ԻՇԽԱՆ ՍԱՂԱԹԵԼԵԱՆ.- Տարբեր բիզնեսներ՝ չափազանցուած է ասուած: Ամէն դէպքում՝ ես երբեք չեմ ժխտել այն փաստը, որ ժամանակին հիմնել եմ ընկերութիւն եւ գործարարութեամբ զբաղուել: Ես 22 տարեկանում՝ դեռեւս ուսանողական տարիներին, 50 դոլար կապիտալով ստեղծել եմ ընկերութիւն, սակայն երբեւէ որեւէ ընկերութիւնում տնօրէն չեմ եղել կամ վարչական այլ աշխատանք չեմ իրականացրել: Ընկերութիւնը հիմնելու ժամանակահատուածում որեւէ պաշտօն չեմ զբաղեցրել: Բիզնեսն իմ եւ ընտանիքիս համար եղել է ապրուստի միջոց: Ներկայումս ես անմիջականօրէն չեմ զբաղւում ձեռնարկատիրական գործունէութեամբ: Ես ամբողջութեամբ կիսում եմ պարոն նախարարի տեսակէտը: Իմ կարծիքով՝ մարդիկ չպէտք է իրենց բիզնեսն օգտագործեն պաշտօն ստանալու կամ քաղաքականութիւն մտնելու, եւ հակառակը՝ երբեք պաշտօնը չպէտք է օգտագործեն բիզնեսը զարգացնելու համար: Սա ինձ համար սկզբունքային է եւ խոր համոզմունք: