ԹԱՄԱՐԱ ԳՐԻԳՈՐԵԱՆ
Թամարա Գրիգորեան
Կամօ Կնեազեանը Քարվաճառում է բնակւում 20 տարուց աւելի: Մեղուապահութեամբ զբաղւում է արդէն շուրջ 10 տարի: Այս պահին իր տան բակում 40 մեղուափեթակ ունի:
Փորձառու մեղուապահը վստահ է` Քարվաճառի մեղրն իր որակական յատկանիշներով տարբերւում է այլ վայրերի մեղրից: «Այստեղ մեղրը լաւն է, քանի որ բերքն առատ է, մեղուներին կերակրելու կարիք չկայ, մեղրը մաքուր ու լրիւ բնական է ստացւում», նշում է մեղուապահն ու յաւելում. «Մեր շրջանում ծաղիկների տեսակները շատ են: Այստեղ մեղուները նեկտար են բերում հիմնականում լորենու ծաղիկներից, կորնգանից»:
Ինչպէս մեզ տեղեկացրին Շահումեանի շրջանի վարչակազմի աշխատակազմի գիւղատնտեսութեան ու հողօգտագործման բաժնից, այս տարի ամբողջ շրջանում հաշւուում է 2710 մեղուափեթակ:
Մեղուապահութիւնը շրջանի հիմնական գիւղատնտեսական ուղղութիւններից է: Շահումեանի շրջանի աշխարհագրական դիրքն ու գօտիականութիւնը իր առանձնայատուկ բնակլիմայական պայմաններով եւ բուսական ծածկով նպատակայարմար է մեղուաբուծութեան համար: Շրջանի մեղրն աւելի լայն ներկայացնելու ու ճանաչելի դարձնելու նպատակով նախորդ տարուանից շրջանի վարչակազմի նախաձեռնութեամբ Քարվաճառում կազմակերպւում է Մեղրի փառատօն:
Շրջվարչակազմի գիւղատնտեսութեան բաժնում վստահ են` մեղուաբուծական արտադրանքի աւելացման, արտադրութեան արդիւնաւէտութեան բարձրացման, արտահանման ծաւալների աճի համար պետութեան կողմից մեղուաբուծութեան ծրագրերով յատկացուող նպատակային փոխառութիւնները պէտք է տրամադրել այնպիսի բնակիչների, ովքեր ունեն փորձ եւ փոխառութիւնները նպատակային կ՛օգտագործեն:
Կամօ Կնեազեանն ամէն տարի մեղրը վաճառում է հէնց իր տնից: Ասում է` մեղրը գնում են թէ՛ տեղացիները, թէ՛ դրսից եկած հիւրերը:
Խօսելով այս տարուայ ակնկալիքից` մեղուապահը մտահոգութիւն յայտնեց, որ այս տարի մեղուները դեռ լաւ բերք չեն բերել, միեւնոյն ժամանակ ընդգծելով, որ դեռեւս ժամանակ կայ. մեղրաքամը շրջանում անում են մօտաւորապէս Օգոստոսի 10ից:
«Մեղրաքամին դեռ մէկ ամսից աւել ժամանակ կայ: Յոյս ունեմ, որ լորենին լաւ կը ծաղկի, եղանակն էլ բարենպաստ կը լինի, ու մեղուները մինչեւ մեղրաքամ կը հասցնեն լաւ բերք բերել», լաւատեսօրէն ամփոփեց մեր զրուցակիցը:
«Ասպարէզ» թերթի համար, «Արարատ» հիմնադրամի կողմից