«ԱՊԱՌԱԺ»Ի ԽՄԲԱԳՐԱԿԱՆ
Հայաստանի Հանրապետութեան եւ Արցախի իշխանութիւնների միջեւ առկայ են լարուած յարաբերութիւններ: Ինչքան էլ երկու կողմից բացատրութիւններ տրուեն, հաւաստիքներ հնչեցուեն ընկերային ցանցերում, այս կամ այն ճամբարին պատկանող զանգուածային լրատուական միջոցներում առկայ են մեղադրանքների եւ հակասութիւնները բացայայտող երկկողմանի հրաձգութիւններ: Լարուածութիւնը սկսուել է դեռեւս 2018 թուականի Դեկտեմբերին տեղի ունեցած ՀՀ ԱԺ ընտրական քարոզարշաւի ժամանակ, երբ պատգամաւորական թեկնածու Սասուն Միքայէլեանը 2018 թուականի Ապրիլի իշխանափոխութիւնը առաւել արժեւորեց, քան՝ արցախեան յաղթանակը:
Բանն այն է, որ վերջին 20 տարիներին, մինչեւ 2018 թուականի Ապրիլին տեղի ունեցած իշխանափոխութիւնը Հայաստանի թէ՛ ներքին, թէ՛ արտաքին քաղաքականութեան դաշտում առանցքային տեղ է գրաւել արցախեան հիմնահարցը: Մինչեւ իսկ Լեւոն Տէր Պետրոսեանի իշխանութեան աւարտը պայմանաւորուել է արցախեան հիմնախնդրի վերաբերեալ իշխող ընտրանու ներսում գոյութիւն ունեցող հակասութիւնների պատճառով: Չենք կարող չնկատել, որ արցախեան հիմնահարցի կարեւորութիւնն օգտագործուել է իշխանութեան դէմ ուղղուած արդարացի պահանջներին դիմակայելու համար, որն իր բացասական ազդեցութիւնն է ունեցել հասարակութեան որոշ շերտերի մէջ արցախեան հարցի շուրջ զգայունութեան ձեւաւորման հարցում:
Այսուհանդերձ, արցախեան հիմնահարցի առանցքայնութիւնը դարձել է հայ ժողովրդի ազգային ազատագրական պայքարի գաղափարական լիցք, որը համայն հայութեան մօտ կարեւոր նշանակութիւն ունի՝ թէ՛ սփիւռքեան մակարդակում հայապահպանութեան եւ թէ՛ ներհայաստանեան մակարդակում ինքնապաշտպանութեան եւ ձեռք բերածի պահպանման ու զարգացման ուղու մէջ: Հէնց այդտեղից է իմաստաւորւում Դաշնակցութեան ռազմավարական մօտեցումները խտացնող, ներկայ օրերում մեզ անհրաժեշտ՝ «Զարգանալ՝ չզիջելով» կարգախօսի ուղերձը:
Այսօր Հայաստանի տարածքը, շնորհիւ ազատագրական պայքարում ձեռք բերած յաջողութիւնների, 42 հազար քառակուսի քիլոմեթր է, որի պահպանումն ու բարգաւաճումը պէտք է լինի հայկական պետական համակարգի կարեւորագոյն առաքելութիւնը:
Ելնելով վերոնշեալից՝ Արցախի պետական համակարգի առանցքային հիմնահարցը նաեւ անվտանգութեան տարր պէտք է հանդիսանայ Արցախի տարածքի զարգացումն ու 12 հազար քառակուսի քիլոմեթր կազմող անկախ երկրի բարգաւաճումը: Այս կարեւորագոյն ուղին է, որի հիման վրայ պէտք է ձեւաւորուի համազգային զարգացման հեռանկարը:
Վերադառնալով Հայաստանի եւ Արցախի իշխանութիւնների միջեւ առկայ լարուածութեանը՝ ՀՅ Դաշնակցութիւնը համոզուած է, որ այս հարցը կը լուծուի ԱՀ եւ ՀՀ միջեւ ռազմավարական դաշինքի կնքման միջոցով: Այսպիսով, կը կանխարգելուեն կամայական կամ ճաշակային մօտեցումները, եւ պարզ ու յստակ կը դառնայ իւրաքանչիւր կողմի սահմանները եւ պարտաւորութիւնները միւսի նկատմամբ: Բնական զարգացում ապահովելու համար պարտաւոր ենք կանխարգելել իւրաքանչիւր ճնշում: Դա կարող է լինել թէ՛ ներքին եւ թէ՛ արտաքին դաշտից:
Քաղաքական վերադասաւորումների լոյսի ներքոյ վերը նշուած հարցերը այն հիմնադրոյթներն են, որոնց հիման վրայ իւրաքանչիւր քաղաքական ուժ պէտք է ձեւաւորի իր տեսլականը եւ շունչ ու հոգի տայ Արցախի քաղաքացու պատուերին: