ԶԱՒԷՆ ԽԱՆՃԵԱՆ
ԱՀԱԸ գործադիր տնօրէն
«Առանց նուիրումի ոչինչ չի լինում»:
Թ. Դ. ՋԷՅՔՍ
Երկու հազար տասնութ թուականը երեսուներորդ տարելիցն է Հայաստանի աւերիչ երկրաշարժի, որ տեղի ունեցաւ 1988ի Դեկտեմբերի 7ին:
Նաեւ 100րդ տարեդարձն է Ամերիկայի Հայ աւետարանչական ընկերակցութեան:
Սոյն թուականի Սեպտեմբերին Ամերիկայի Հայ աւետարանչական ընկերակցութիւնն իր հարիւրամեակը տօնեց մայր հայրենիքում՝ Հայաստանում: Սեպտեմբերի 30ին կատարեցինք Ամերիկայի Հայ աւետարանչական ընկերակցութեան համայնքային նոր կենտրոնի եւ մատուռի նաւակատիքը Գիւմրիում եւ նուիրաբերեցինք Ամենակալ Աստծուն: Կենտրոնը Ամերիկայի Հայ աւետարանչական ընկերակցութեան ընծան է Գիւմրիի մեր հայրենակիցներին: Աւելի քան հարիւր հիւրեր եւ հովանաւորներ Սփիւռքից Սեպտեմբերի 30ին Գիւմրի եկան՝ նշանաւորելու Հայաստանի մշակութային ժառանգութեան եւ մտաւոր գանձարան «էպիկենտրոն»ի վերածնունդը: Այս կենտրոնը խինդ է տալու իր շահառու մանկանց, ժպիտ է ցոլացնելու նրանց դէմքերին եւ պատիւ է բերելու Աստծուն:
Ամերիկայի Հայ աւետարանչական ընկերակցութեան այս ձեռնարկը համաքայլ էր ընկերակցութեան անդամ զարմանահրաշ մի զոյգի ջանքերին, որ երեսուն տարի առաջ հայրենիքը պատուհասած մարդկային եւ ազգային աղէտի օրերին, հաստատապէս վճռեց՝ «Մենք անելիք ունենք»: Եւ արեցին: Եւ անում են մինչ օրս:
Մեր ընկերակցութեան լրատու հանդէսում Ջոն եւ Միշել Սիմուրեան զոյգի մասին պատմող ակնարկը բացայայտում է «Մենք անելիք ունենք» նուիրումի, բարի կամքի եւ գործողութեան զօրութիւնը: «Երկաթէ վարագոյրով» պատնէշուած աշխարհում այս հրաշք պատմութիւնը վկայում է, թէ ինչպէ՛ս է «Մենք անելիք ունենք» ինքնանուիրումը հալեցնում անհնարինութեան եւ անանցանելիութեան սառոյցը՝ կեանք ներարկելով թուացեալ անյոյս իրականութեան մէջ:
Ընկերակցութեան նուիրեալ հոգաբարձու տիկին Ֆիլիս Տոհանեանի շնորհիւ ամերիկեան «Բոսթոն Գլոբ» պարբերականի հանրայայտ (այժմ՝ պաշտօնաթող) լրագրող եւ խմբագիր, Պուլիցերեան գրական մրցանակի եռակի դափնեկիր Սթիւեն Քուրքչեանը մեր ընթերցողի դատին է յանձնում այս ուշագրաւ պատմութիւնը:
Լրատուի այս համարում Ամերիկայի Հայ աւետարանչական ընկերակցութեան Գիւմրիի ներկայացուցիչ Կարէն Մանուկեանը, որը 1988ի երկրաշարժի ժամանակ եօթերորդ դասարանի աշակերտ էր, վերհիշում է աղէտի ծանր հետեւանքները եւ կշեռքի հակադիր նժարին դնում նորաբաց կենտրոնի դերն ու Գիւմրիում ընկերակցութեան բերած նպաստի ու ծառայութեան հարուստ պատմութիւնը:
Ամերիկայի Հայ աւետարանչական ընկերակցութեան՝ ծնողազուրկների եւ մանկախնամ ծրագիրը, որն ինքնին ծնունդն էր երկրաշարժի, շարունակում է ծառայել Հայաստանի եւ Արցախի կարիքաւոր երեխաներին: Ընկերակցութեան վարչութեան անդամ եւ ծրագրի հիմնադիր, համանախագահ տիկին Միշել Սիմուրեանը տակաւին վերջերս է հանգստի անցել աւելի քան քսանհինգ տարի ծառայելուց յետոյ: Մենք խորապէս գնահատում ենք յարգարժան տիկնոջ բազմամեայ նուիրումն ու անխոնջ ծառայութիւնը:
Ամերիկայի Հայ աւետարանչական ընկերակցութիւնը հաւատարիմ է մնում «Մենք անելիք ունենք»ի նուիրումին՝ հաւաստելով ողջ աշխարհում հաւատի, սիրոյ եւ ծառայութեան երկրորդ հարիւրամեակի իր յանձնառութիւնը: Ընկերակցութեան հարիւրամեակի արշաւը շարունակւում է բազմաբնոյթ ծրագրերով եւ գործերով, որոնք կարիք ունեն դրամական աջակցութեան:
Իրաւամբ հպարտանում ենք Ջոնի, Միշելի, Սթիւենի, Կարէնի եւ շատ այլ անհատների գործերով, որոնց անունները կարելի է անվերջ թուարկել: Հրաւիրում ենք իւրաքանչիւրիդ՝ քննելու ձեր սիրտը եւ տեսնելու, թէ «Ես անելիք ունեմ» ասելով՝ որտեղ էք յառում ձեր հայեացքը:
Խորին եւ անկեղծ շնորհակալութիւն բոլորիդ: