«Ազատութիւն» ձայնասփիւռը հարցազրոյց մը կատարած է սփիւռքի նախարարի պաշտօնակատար Մխիթար Հայրապետեանի հետ: Վերջինս հոն կը մատնանշէ իր գլխաւորած նախարարութեան գործունէութեան ոչ-գոհացուցիչ բնոյթը եւ կ՛արծարծէ կամ զայն փակելու հաւանականութիւնը, կամ ալ աւելի գործօն եւ աշխոյժ դարձնելու անհրաժեշտութիւնը:
Ստորեւ հարցազրոյցը.
«ԱԶԱՏՈՒԹԻՒՆ».– Յայտնի է, որ նախարարութիւններ են կրճատուելու: Ձեր ղեկավարած գերատեսչութիւնը կա՞յ այդ շարքում:
ՄԽԻԹԱՐ ՀԱՅՐԱՊԵՏԵԱՆ.– Այս պահին շարունակում ենք քննարկել: Երկու ճանապարհ կայ. նախարարութեան փակման հարցն է եւ նախարարութեան հզօրացման հարցն է: Ես ինքս առաջարկել եմ երկրորդ տարբերակը՝ աւելի մեծ գործառոյթներով ու լծակներով գերատեսչութիւն: Սակայն ինչ որոշում էլ, որ կառավարութիւնը՝ Փաշինեանի գլխաւորութեամբ կայացնի, բացառապէս միտուած է լինելու աւելի արդիւնաւէտ կառավարման: Սփիւռքի նախարարութիւնը, նաեւ ինքս վերջին եօթը ամիսների ընթացքում ինձ վրայ եմ զգացել, որ այն կրել է հիմնականում սիմվոլիկ (խորհրդանշական-Խմբ.) բնոյթ: Նախարարութիւնը որպէս այդպիսին ունենալու համար, ենթադրում եմ, Սփիւռքին որոշակի ուղերձներ յղելու համար՝ Սփիւռքից աջակցութիւն ստանալու ակնկալիքով: Գոնէ ուսումնասիրելով այդ ամբողջ տասը տարիների կատարած աշխատանքը,– թէեւ իսկապէս լուսաւոր կէտեր եղել են,- բայց ըստ էութեան նախարարութիւնը իր առջեւ չի դրել յաւակնոտ խնդիրներ: Ես կարծում եմ, որ սփիւռքի նախարարութիւնը Հայաստանի պարագայում՝ ունենալով եօթմիլիոնանոց Սփիւռք, կարող է ունենալ այնպիսի մի գերատեսչութիւն, որը ստանալով նոր լծակներ, իր առջեւ կը դնի տասը հազար անգամ, հարիւր հազար անգամ աւելի մեծ, թէկուզ եւ անլուծելի թուացող խնդիրներ:
«ԱԶԱՏՈՒԹԻՒՆ».- Քանի՞ աշխատակից ունէք:
ՄԽԻԹԱՐ ՀԱՅՐԱՊԵՏԵԱՆ.– Ութսունութ:
«ԱԶԱՏՈՒԹԻՒՆ».- Եթէ փակուի նախարարութիւնը, ինչպէս Հանրապետականն է ասում, այս մարդկանց փողո՞ց էք գցելու:
ՄԽԻԹԱՐ ՀԱՅՐԱՊԵՏԵԱՆ.– Չեմ կարծում: Օպտիմալացման մասին վարչապետը խօսել է, եւ օպտիմալացումը իրենից ենթադրում է նաեւ որոշակի հաստիքների կրճատում, սակայն խօսքը փակման մասին չէ, այլ ձեւաչափի փոփոխման մասին է: Այսինքն, կա՛մ որեւէ այլ նախարարութեան կազմում կը լինի, կա՛մ կոմիտէի տեսքով կը լինի… Ութսունութ աշխատակիցներին աշխատանքից զրկելու մասին չի խօսքը:
«ԱԶԱՏՈՒԹԻՒՆ».-Հօ բոլորին չի՞ կարողանալու կառավարութիւնը տեղաւորել:
ՄԽԻԹԱՐ ՀԱՅՐԱՊԵՏԵԱՆ.– Այո, օպտիմալացում լինելու է, որովհետեւ պետական ծառայողների թիւը ուռճացուած է միանշանակ:
«ԱԶԱՏՈՒԹԻՒՆ».- Եթէ նախարարութիւնը կրճատուի, նշանակո՞ւմ է սա, որ դուք էլ կը գնաք խորհրդարան՝ որպէս պատգամաւոր աշխատելու:
ՄԽԻԹԱՐ ՀԱՅՐԱՊԵՏԵԱՆ.– Չի բացառւում: Ես ի սկզբանէ յայտարարեցի, որ թէ՛ օրէնսդիրում եւ թէ գործադիրում տեսնում եմ իմ քաղաքական գործունէութիւնը: Լինելով օրէնսդիրում, անշուշտ, Սփիւռքի հարցերը լինելու են ինձ համար առաջնահերթութիւն:
«ԱԶԱՏՈՒԹԻՒՆ».-Դուք արձակուրդ գնալո՞ւ էք քարոզարշաւի շրջանում:
ՄԽԻԹԱՐ ՀԱՅՐԱՊԵՏԵԱՆ.– Այո: Նոյեմբերի 26ից արձակուրդ եմ գնում, որպէսզի ակտիւօրէն մասնակցեմ նախընտրական քարոզարշաւին:
«ԱԶԱՏՈՒԹԻՒՆ».- Ձեր բացատրութիւնը վարչական լծակի կիրառման վերաբերեալ. բացառո՞ւմ էք:
ՄԽԻԹԱՐ ՀԱՅՐԱՊԵՏԵԱՆ.– Բնականաբար: Որովհետեւ բացառապէս պատրաստւում եմ կենտրոնանալ նախընտրական շրջանի եւ քարոզարշաւի վրայ: Ինքս երկխօսութիւն եմ ունեցել աշխատակազմի հետ, յստակ դրուել է խնդիրը, որ պիտի բացառենք վարչական ռեսուրսի օգտագործումը: Անգամ օնլայն հարթակում կոչ եմ արել զսպուածութիւն դրսեւորել՝ եթէ իմ տարածած նիւթերը կրում են նախընտրական բովանդակութիւն, այլ ոչ թէ բացառապէս իմ գործառոյթների, պաշտօնի հետ կապուած, կոչ եմ արել, որպէսզի զերծ մնան նոյնիսկ դրանց տարածումից:
«ԱԶԱՏՈՒԹԻՒՆ».- Թեկնածու բոլո՞ր նախարարներն են գնալու արձակուրդ:
ՄԽԻԹԱՐ ՀԱՅՐԱՊԵՏԵԱՆ.– Հիմնական մասը, որ առաջադրուել են, գնալու են արձակուրդի: