Quantcast
Channel: Asbarez - Armenian »Կիզակէտ
Viewing all articles
Browse latest Browse all 2064

Անհրաժեշտ Հեռանկար Մը

$
0
0

 

0628ladoyan

Յ. ԼԱՏՈՅԵԱՆ

 

Հայաստանի սահմանադրութեան 48րդ յօդուածը կ՛ըսէ. «Տնտեսական, սոցիալական եւ մշակութային ոլորտներում պետութեան հիմնական խնդիրներից է իրականացնել բնակչութեան առողջութեան պահպանման ծրագրեր, նպաստել եւ արդիւնաւէտ եւ մատչելի բժշկական սպասարկման պայմանների ստեղծմանը»:

Հայաստանի անկախութենէն ի վեր գործող իրերայաջորդ իշխանութիւնները, որ խորքին մէջ նոյն արժեհամակարգով գործած են, ոչ մէկ ատեն բժշկական մարզին հանդէպ լուրջ մօտեցում ցուցաբերած են:

Այսօր փաստօրէն Հայաստանի ղեկավար դասակարգը իր բժշկական բարդ հարցերուն համար կ՛երթայ Մոսկուա կամ եւրոպական երկիրներ: Ուրիշ խօսքով, անհրաժեշտ խնամքի եւ մասնագիտութեան պակասը կը մղէ, որ այդ քայլը առնեն: «Սիվիլնե»չը վերջերս հրապարակած էր վիճակագրութիւն մը, ուր ցոյց կու տայ, որ պետական պատուէրէն օգտուելու իրաւունք ունեցած  (անվճար ծառայութիւն ստացող-Խմբ.) են 100 մարդէ 9ը: Գիւղական շրջաններու մէջ ապրող ժողովուրդին ամէնէն մօտ բուժկէտը 10 քիլոմեթր հեռաւորութեան վրայ է:

Անմատչելիութեան եւ անհասանելիութեան պատճառով ժողովուրդին 40.2 առ հարիւրը կը դիմէ ինքնաբուժումի:

Տակաւին շարքը կ՛երկարի: Տարբեր վիճակագրական ուսումնասիրութիւններ բաւական նախնական եւ մտահոգիչ վիճակներ կը պարզեն բժշկական խնամքի, ծառայութեան, հասանելիութեան եւ մատչելիութեան իմաստով:

Հայաստանը այսօր կրնայ մրցունակ բժշկական խնամքի կեդրոն դառնալ: Փաստօրէն Լիբանանը, Յորդանանը եւ Իսրայէլը բժշկական իրենց ծառայութիւններով եւ մակարդակով նաեւ օտար զբօսաշրջիկներ կը ներգրաւեն:

Ոչ մէկ պատճառ կայ, որ Հայաստանն ալ նոյն մակարդակի եւ մրցանակութեան չհասնի: Սփիւռքի իր ներուժը եւ նիւթական միջազգային ներդրումները բաւական պատրաստ ենթահող են, որ ասիկա բարձր մակարդակով ծրագրուի: Թէ՛ Հայաստանի բնակչութեան, թէ՛ ալ բժշկական զբօսաշրջութեան իմաստով ապագայ ունեցող ներդրում կ՛ըլլայ:


Viewing all articles
Browse latest Browse all 2064

Trending Articles